Средба на Фицо и Шмигал во Ужгород: Постигнати договори за серија проблеми

 Украинскиот премиер Денис Шмигал денеска во Ужгород се сретна со својот словачки колега Роберт Фицо за да разговараат за нивните разлики околу руската инвазија на Украина и продолжувањето на помошта од Западот за земјата.

„И покрај нашите разлики, имаме намера да водиме прагматична политика со словачката влада која ќе биде од корист за двете страни“, објави Шмигал на социјалните мрежи.

Тој изрази уверување дека денешната средба со Роберт Фицо – нивна прва по изборот на словачкиот лидер во октомври 2023 година – ќе „отвори нова страница“ во односите меѓу Киев и Братислава.

Претходно денеска, украинскиот премиер додаде дека „со нетрпение очекува конструктивен дијалог“, придружувајќи ја изјавата со две кратки видеа на кои двајцата лидери се ракуваат пред камерите. Тој прецизираше дека ќе се разговара за „билатералните односи и поддршката на европските иницијативи“.

„Има многу теми за кои треба да разговараме. Има прашања за кои можеме да имаме различни мислења. Таков е животот. Но, навистина сакаме да постигнеме напредок. Ќе видите дека навистина сакаме да ви помогнеме“, рече Фицо.

Односите меѓу Словачка и Украина во голема мера се влошија по серијата провокативни коментари на Фицо. Тој беше избран во октомври 2023 година, но веќе го доведе во прашање суверенитетот на Украина и повика на компромис со Русија. Веднаш по неговиот избор, лидерот најави и дека ќе го запре снабдувањето со словачко оружје за Украина – прва таква одлука на западен сојузник.

Фицо се спротивставува и на бројните санкции наметнати на Русија речиси две години.

По средбата, Шмигал на Икс објави дека е постигнат договор за голем број важни прашања, вклучувајќи го и „Механизмот за Украина“, кој зависи од помошта на ЕУ за Киев во вредност од 50 милијарди евра.

„Словачката влада нема да го блокира купувањето оружје и опрема од Украина од страна на словачки компании. Словачка ќе ја поддржи програмата ‘Механизам за Украина’, која предвидува обезбедување 50 милијарди евра од ЕУ за Украина“, рече Шмигал.

Тој додаде дека и покрај политичките предизвици, развиваат „политика на нов прагматизам“ во односите.

„Украина и Словачка ќе продолжат со плодната соработка за доброто на безбедноста и просперитетот на нашите земји. Благодарни сме на словачкиот народ кој им помага на Украина и на Украинците во овие тешки моменти“, нагласи Шмигал.