Skip to content
Обилни снежни врнежи ја зафатија Сјеница во Србија, каде што утрово на целата територија на општината беа измерени околу 40 сантиметри снег, а врнежите и понатаму продолжуваат со засилен интензитет. И покрај тешките услови, градот во моментов е прооден, додека чистењето на патиштата во руралните средини е привремено прекинато поради исклучително слаба видливост.
Заменик-градоначалникот на општина Сјеница, Радиша Кнежевиќ, изјави дека снегот врне од раните утрински часови, но без ветер, што значително ја олеснува ситуацијата во споредба со претходните снежни бури.
„Низ целата општина има околу 40 сантиметри снег. Градските улици се редовно одржувани и засега се проодни. Среќна околност е што нема ветер – мирно и тивко е“, изјави Кнежевиќ.
Најкритична е состојбата во селските подрачја, каде што поради густа магла и видливост помала од 20 метри, механизацијата не може безбедно да интервенира.
„Во селата во моментов не се расчистува, бидејќи нема услови за безбедна работа. Реагираме само во итни случаи“, посочи заменик-градоначалникот.
Општината, како што додава, е целосно подготвена за брза интервенција веднаш штом ќе се подобрат временските услови. На располагање се 20 машини кои ќе бидат ангажирани за расчистување и нормализирање на сообраќајот.
Во текот на ноќта, дел од месната заедница Баре останал без електрична енергија, но дефектот бил брзо отстранет. Според надлежните, снабдувањето со струја и вода во моментов е стабилно.
Критичниот патен правец кај Дуга Пољана, кој вообичаено создава проблеми при силен ветер и снег, засега е стабилен.
Надлежните служби ја следат состојбата на терен на секој час, а на граѓаните им се препорачува зголемена внимателност додека траат обилните снежни врнежи.
Сјеница и нејзината околина се познати како „Српски Сибир“ – најстудениот регион во Србија, каде зимите се сурови, а снежната покривка често достигнува значителна височина.