Стејт департментот ќе ги поддржи напорите за откривање и казнување на одговорните за нападот во Косово

Вашинготн ќе ги поддржи напорите за пронаоѓање и казнување на одговорните за нападот на водоводниот канал на Ибар-Лепенец во Зубин Поток во северот на Косово, соопшти портпаролот на Стејт департментот Метју Милер во објава на X.

Стејт департментот го осуди нападот од 29 ноември и порачаа дека внимателно ќе ја следат истрагата.

„Го осудуваме нападот на 29 ноември врз водоводот во Косово. Ќе ги поддржиме напорите за пронаоѓање и казнување на одговорните и ќе ги цениме сите понуди за поддршка за овој напор“, напиша Милер.

Тој им се заблагодари на „работниците за итна помош и на другите, вклучително и на КФОР, за обновувањето на водоснабдувањето“ во областите погодени од нападот.

Амбасадорот на САД во Косово, Џефри Ховениер, во неговата реакција веднаш по експлозијата на 29 ноември, порача дека „САД силно го осудуваат нападот на критичната инфраструктура во Косово, при што беше оштетен воден канал во Зубин Поток, кој е од суштинско значење за снабдувањето со вода на Косово и за работата на косовските електрани“.

„Ние внимателно ја следиме ситуацијата, ќе поддржиме сеопфатна истрага и ја понудивме нашата целосна поддршка на Владата на Косово за да се осигури дека одговорните за овој криминален напад ќе бидат идентификувани и повикани на одговорност“, напиша Ховениер на X.

Нападот го оценија како терористички и го осудија и Европска Унија и повеќе западноевропски земји, меѓу кои Германија, Велика Британија, Италија и Франција.