Skip to content
Пространата двокатна вила се наоѓа на нешто повеќе од километар и половина од една од прекрасните палати на Владимир Путин, а Стивен Сигал ја купил откако се здружил со Кремљ во 2018 година и станал еден од неговите најгласни поддржувачи.
Актерот е обвинет дека ја искористил својата позната репутација и блискост со Путин за да побара цена до седум пати повисока од реалната вредност на овој имот, пишува The Sun.
Мала куќа во елитно предградие
Домот на ѕвездата од „Под опсада“ се наоѓа во ултраелитното предградие Рубљовка, западно од Москва, и всушност е една од помалите куќи во областа. Според руските бизнис портали, вилата тивко била ставена на продажба оваа недела по неверојатни 6,6 милиони фунти (околу 7,5 милиони евра).
Фотографиите од вилата, кои досега не беа достапни за јавноста, беа објавени откако се појави огласот. Вилата од 500 квадратни метри има три спални соби и бањи, приватно кино, винска соба, студија и гаража за два автомобили, пишува b92.
Сегал: „Јас сум милион проценти Русин“
Да се потсетиме дека во 2023 година, некогашната голема холивудска ѕвезда Сигал се прогласи за „еден милион проценти Русин“, а познатиот актер дури има и руско државјанство. Зборувајќи на прес-конференција на собирот на Меѓународното русофилско движење во Москва, тој рече дека „околу половина од Американците сè уште ја сакаат Русија и покрај меѓународните превирања“.
Актерот зборуваше и за своето потекло, наведувајќи дека неговиот дедо емигрирал во Америка од Русија и открил што значи за него да се биде Русин.
„Да се биде Русин значи да се залагаш и да се бориш за вистината. Можам да кажам дека сум сто проценти русофил и еден милион проценти Русин“, рече Сигал. Актерот коментираше и за Орденот за пријателство, кој му го додели претседателот на Русија, Владимир Путин.