Skip to content
На иницијатива на Универзитетското студентско собрание на УКИМ, е направена значајна измена во Правилникот за содржината и формата на дипломата, упатството за подготовка на додаток на дипломата и на другите јавни исправи и со тоа е овозможено конечно воведување на електронскиот индекс.
На иницијатива на УСС-УКИМ, беше поднесено барање до Министерството за образование и наука за ревидирање на регулативата, со што се отвори патот кон модернизација на академската администрација.
Со ова, студентите во Македонија ќе добијат поефикасен и транспарентен образовен систем, ослободен од непотребни бирократски процедури. Долгите редици пред студентските служби и употребата на хартиени индекси наскоро ќе бидат минато.
Дигитализацијата е приоритет и на Националното студентско тело. Под менторство на Бојан Кордалов, а со поддршка на Фондацијата за демократија на Вестминстер, во рамки на проектот „Практикувај демократија“ (октомври – декември 2024), беше изработено истражување за моменталната состојба на дигитализацијата во високото образование, дефинирани се приоритетните услуги за дигитализација и подготвен е акциски план.
Сега останува да се потпише меморандум за соработка помеѓу Националното студентско тело, Интеруниверзитетската конференција на РСМ, Клубот за младински прашања и политики, Министерството за дигитална трансформација и Министерството за образование и наука.
Како студентски претставници, порачуваат од УСС, организацијата на студентите останува посветена на унапредување на студентските права и модернизација на академските процеси. Воведувањето на електронскиот индекс не е само техничка промена – туку суштински чекор кон поедноставен административен тек и подобра достапност на информации за сите студенти, велат од УСС.
