Супер богаташите се селат од Дубаи, ова е нивната следна дестинација

Дубаи со години важеше за природна адреса за светската елита, но сè повеќе ултрабогати семејства и инвеститори сега погледот го насочуваат кон Милано, град што во 2026 година се наметнува како нова европска база за луксузен живот, престиж и финансиска сигурност.

Трендот се засилува во време на растечка нестабилност на Блискиот Исток, но и поради даночните и животните предности што Италија им ги нуди на богатите нови резиденти.

Во срцето на овој интерес е Милано, кој одамна не е само модна престолнина, туку и град на банки, фондови, приватен капитал и луксузни недвижности.

Според медиумските и пазарните анализи, токму таму сега се концентрира нов бран странски купувачи кои бараат европска алтернатива на Дубаи, а во позадина стои и италијанскиот паушален даночен режим за нови резиденти, кој од 2026 година изнесува 300.000 евра годишно за приходи остварени во странство.

Дополнителен поттик за преселбите е и промената во британскиот даночен режим, по која дел од богатите Британци и меѓународни инвеститори почнаа да бараат нови безбедни точки во Европа.

Италија, а особено Милано, се наметнува како место што нуди комбинација од висок животен стандард, пристап до европскиот пазар, даночна предвидливост и урбан луксуз, без да се оттурне од традиционалните финансиски текови.

Пазарот на недвижности веќе ја чувствува таа промена. Според најновите анализи, цените на луксузните станови во Милано пораснале за околу 38 проценти во последните пет години, што дополнително го потврдува притисокот од новата богата побарувачка.

Така, градот сè поотворено се позиционира како европска замена за оние што досега Дубаи го гледаа како најсигурна дестинација за живот и капитал.