Skip to content
Под мотото „Здрави почви за здрави градови“, годинашниот Светски ден на почвите, прогласен од Обединетите нации, ја истакнува клучната улога на почвата во урбаните средини – тема која сè повеќе добива на значење во услови на климатски промени и забрзана урбанизација.
Иако најчесто невидлива под асфалт, бетон и градби, градската почва има серија витални функции. Кога е пропустлива и покриена со вегетација, таа ја апсорбира дождовната вода, го намалува ризикот од поплави, ја регулира температурата во градските јадра, складира јаглерод и придонесува за подобар квалитет на воздухот. Но кога е целосно запечатена со бетон, почвата ги губи овие природни функции, што ги прави градовите поранливи на екстремни временски настани, прекумерно загревање и загадување.
Во исто време, здравата почва е темел за производство на здрава и квалитетна храна. Стручњаците предупредуваат дека долготрајната употреба на штетни супстанци и неприлагодени земјоделски практики ја деградира нејзината способност да создава хранливи производи – процес што има директни последици врз јавното здравје и безбедноста на храната.
По повод Светскиот ден на почвите, научниците и еколошките организации потсетуваат: почвата е жив екосистем кој го одржува целиот живот на планетата. Нејзината заштита – и во градовите и во земјоделските подрачја – е предуслов за одржлив развој, отпорни градови и здрава иднина.
