Талевски: Ништо нема од Мицковото ‘треба да се удри во чело‘, освен враќање на режимот на ДПМНЕ на голема врата

„Нема реформи, туку враќање на режимот на ДПМНЕ и тоа на голема врата, партизација на институциите, особено во судството. Каква е таа доверба кај граѓаните, кога Мицкоски, излегува со Фејсбук статус во кој вика ‘ треба да се удри во чело‘. Па на кого да удриме во чело? Со тоа што ќе го партизираат судството? рече пратеникот на СДСМ, Миле Талевски.

Талевски смета дека власта најбезобразно и најлицемерно прави упад и при изборот на членови на судскиот совет, како и со државниот јавен обвинител.

„Првата одлука која ја донесе ДПМНЕ и со која се гледа дека директно прави упад и партизација во судскиот систем е одлуката за членот на судскиот совет, да се стави сопругата на градоначалникот од ДПМНЕ. Со оваа реторика власта не може да излезе од матрицата дека не треба да се меша во законодавната власт. Да биде поголем парадоксот, ДПМНЕ изјавува дека во судството сите се корумпирани и дека треба да има конкретна промена, за денес ДПМНЕ во Собрание да предлага продолжување на мандатот на судиите. Па каков е тој парадокс. Тоа ли е таа реторика, ‘за удар во чело’ што ја пишува Мицковски на својот Фејсбук профил“, рече Талевски.

Според Талевски, лицемерие и враќање на тефтерчето, се заштитниот знак на ДПМНЕ. Тоа сега се случува и со изборот на јавниот обвинител.

„На граѓаните треба да им биде јасно дека потегот кој го прави Мицковски и ДПМНЕ е да си постави сопствен човек за јавен обвинител. Ние не гледаме никакви реформи или враќање на довербата во правосудниот систем, освен што имаме директен упад на власта во изборот на членовите на судскиот совет, нивно разрешување, а сега и упад во изборот на државниот јавен обвинител“, рече Талевски.

Талевски рече дека СДСМ секогаш е поборник да има реформи во правосудството.

„Нашиот конкретен став е Работната група, која е формирана од министерството за правда, да го предложи законското решение за комплетна реформа во правосудниот систем и врз основа на сите препораки доставени од страна на Оценската мисија, тој предлог ќе го дискутираат на маса сите релевантни фактори, за да усогласиме едно законско решение кое ќе го прифатиме сите, за комплетна реформа на правосудниот систем и тоа да се достави до Венецијанската комисија на одобривање. И ако добиеме одобрение од венецијанската комисија, ние да го донесеме во Собрание. Само така ќе ја вратиме довербата кај граѓаните во правосудството. Бараме процедура врз основа на закон кој ќе биде почитуван и ќе може да се направи темелна реформа. А не ваков упад класичен од ДПМНЕ, со кој не се враќа довербата на граѓаните, ниту пак имаат желба за некакви реформи, освен за партизација и враќање на режимот“, рече пратеникот на СДСМ, Миле Талевски, за МРТВ.