Таткото насилник што тепаше деца на натпреварот Брегалница Шкупи доби кривична пријава

Основното јавно обвинителство Штип поднесе обвинителен предлог за кривично дело насилство против маж кој, на 24 август на стадионот „Бело Брдо“ во Штип, упадна на терен за време на пионерскиот натпревар Брегалница – Шкупи и физички нападна двајца 15-годишни фудбалери на домашниот тим.

Инцидентот се случил во 89-тата минута, по втор жолт картон за неговиот син (играч на Шкупи). Според обвинението, по неспортското однесување на играчот, таткото влегол на терен и со тупаници и клоци ги удирал малолетниците, нанесувајќи им телесни повреди и предизвикувајќи страв и вознемиреност кај публиката.

Неколку присутни навреме интервенирале и спречиле натамошна ескалација. Јавниот обвинител до Основниот суд во Штип доставил и предлог за продолжување на мерката притвор за осомничениот.