Skip to content
Семејниот излет во близина на селцето Сан Џорџо ди Педероба во Италија трагично заврши, откако 10-годишно девојче од Македонија го загуби животот во реката Пјаве. Според информациите од италијанските медиуми, несреќата се случила околу 16 часот во неделата.
Девојчето било со своите родители и браќа на мала плажа покрај реката, позната како популарно место за освежување во текот на летните горештини, но истовремено и опасна поради брзите струи, ненадејните вртлози и наклонот на коритото.
Таа влегла во водата заедно со двајца од нејзините браќа додека родителите набљудувале од брегот. Одеднаш, силната струја ја повлекла под површината и девојчето исчезнало од видот на семејството.
Во потрагата учествувале пожарникари од Монтебелуна и Тревизо, нуркачи и специјални тимови со беспилотни летала, како и хеликоптер од спасувачкиот оддел од Венеција. Карабињерите исто така биле присутни, но пребарувањето го отежнувале силните струи.
Телото било пронајдено по двочасовна потрага, заглавено меѓу големите карпи на дното на реката. Медицинскиот тим можел само да ја констатира смртта на несреќното девојче.
Оваа трагедија повторно ја нагласи опасноста од пливање во реката Пјаве, особено во деловите каде струјата и подводните карпи можат лесно да се претворат во фатални стапици.
