Трагедија во Мјанмар: Зградите продолжуваат да се уриваат, бројот на жртвите надминува 2.700

Пет дена по разорниот земјотрес што ја погоди земјата, зградите во Мјанмар продолжуваат да се уриваат, создавајќи опасни услови за спасувачите кои се обидуваат да извлечат преживеани од урнатините.

Според податоците на воената хунта на Мјанмар, земјотресот со јачина од 7,7 степени однесе повеќе од 2.700 животи, а илјадници луѓе се повредени. Стотици сè уште се водат како исчезнати, што значи дека бројот на жртвите речиси сигурно ќе продолжи да расте.

Во средата, противпожарната служба на Мјанмар објави снимка од емотивен момент во воената престолнина Најпјидо, каде што спасувачи извлекоа маж од урнатините повеќе од 100 часа по земјотресот – чин што внесе мала искра на надеж. Мажот изгледаше исцрпено додека го вадеа од просторот меѓу искршените бетонски плочи, додека насобраните аплаудираа. Ден претходно, на сличен начин беше спасена 62-годишна жена во истиот град.

Земјотресот дополнително ги ослаби веќе кревките објекти, кои продолжуваат да се рушат поради последователните потреси, предупредуваат организациите за човекови права. Тоа дополнително ги отежнува спасувачките операции.

Два хотела во градот Мандалеј, кои беа блиску до епицентарот, се урнаа во понеделникот навечер, откако луѓето се вратија во објектите неколку дена по земјотресот.

„Со овие дополнителни потреси, бројот на жртвите продолжува да расте“, изјави Мајкл Данфорд, директор на Светската програма за храна на ОН за Мјанмар.

Хуманитарна криза и политички пречки

Хуманитарните организации укажуваат на итната потреба од помош, особено во оддалечените региони. Уште пред земјотресот, четири години граѓанска војна оставија милиони луѓе без соодветен покрив над главата, додека здравствениот и комуникацискиот систем беа сериозно нарушени.

Во градот Сагаинг, кој е близу до епицентарот, жителите опишуваат сцени на очај и тага додека чекаат медицинска помош и храна. Организацијата „Амнести Интернешнл“ предупредува дека војската, која има контрола во градот, поставува строги проверки за влез на помошните средства.

Иако воената хунта тврди дека овозможува достава на помош, организации за човекови права ја обвинуваат дека ги ограничува пристапите до погодените региони. „Хунтата мора да престане со своите досегашни практики и да обезбеди хуманитарната помош брзо да стигне до оние чии животи се загрозени“, изјави Бриони Лау од „Хјуман Рајтс Воч“.

Меѓународна помош и примирје на бунтовничките групи

Голема бунтовничка алијанса во Мјанмар прогласи привремено примирје за да се олеснат спасувачките напори.

Во меѓувреме, спасувачки тимови од Кина, Русија и Пакистан, како и два индиски воени брода со хуманитарна помош, се пристигнати во Мјанмар за поддршка на погодените. Сепак, хуманитарните работници предупредуваат дека е потребна многу поголема помош, бидејќи постојаното недоволно финансирање доведе до голем недостиг на ресурси.

„Ова е моментот кога светот мора да се обедини и да го поддржи народот на Мјанмар“, изјави Марколуиџи Корси, хуманитарен координатор на ОН за Мјанмар.

Земјотресот во петокот се почувствува и во соседен Тајланд, каде што загинаа најмалку 22 лица, а во главниот град Бангкок се урна зграда во изградба, одземајќи 15 животи.