Трамп му порача на Израел веднаш да престане со бомбардирањето на Газа

Трамп, кој се претставува себеси како единствениот кој е способен да постигне мир во Газа, инвестираше многу политички капитал во напорите за завршување на двегодишната војна во која загинаа десетици илјади луѓе и го остави сојузникот на САД Израел сè повеќе изолиран на меѓународната сцена, според Ројтерс.

Американскиот претседател Доналд Трамп во петокот му порача на Израел веднаш да престане со бомбардирањето на Газа, откако Хамас се согласи да ослободи заложници и да прифати некои други услови во американскиот план за завршување на војната, но дека спорните прашања како што е разоружувањето остануваат нерешени, објавува Ројтерс.

Кабинетот на израелскиот премиер Бенјамин Нетанјаху соопшти дека Израел се подготвува „веднаш да ја спроведе“ првата фаза од планот на Трамп за Газа, кој повикува на ослободување на израелските заложници, по одговорот на Хамас.

Недолго потоа, израелските медиуми објавија дека политичкото раководство на земјата ѝ наредило на армијата да ги намали офанзивните активности во Газа.

Бомбардирање по објавата на Трамп

Во соопштението, началникот на израелскиот Генералштаб им нареди на силите да ја зголемат својата подготвеност за спроведување на првата фаза од планот на Трамп, без да спомене дали ќе има намалување на воените активности во Газа.

Хамас, палестинската милитантна група што ја контролира Газа, одговори на планот од 20 точки на Трамп откако американскиот претседател им даде рок до недела да го прифатат предлогот или да се соочат со сериозни последици.

Трамп, кој се претставува себеси како единствен способен да постигне мир во Газа, инвестираше многу политички капитал во напорите за завршување на двегодишната војна во која загинаа десетици илјади луѓе и го остави сојузникот на САД Израел сè повеќе изолиран на меѓународната сцена, според Ројтерс.

Трамп рече дека верува оти Хамас покажал дека е „подготвен за траен мир“ и ја префрли вината на владата на Нетанјаху.

„Израел мора веднаш да го запре бомбардирањето на Газа, за да можеме безбедно и брзо да ги извлечеме заложниците! Веќе разговараме за деталите што треба да се договорат. Ова не се однесува само на Газа, туку и на долго посакуваниот МИР на Блискиот Исток“, напиша Трамп на својата платформа Truth Social.

Кабинетот на Нетанјаху соопшти дека Израел „ќе продолжи целосно да соработува со претседателот и неговиот тим за да се стави крај на војната, во согласност со принципите утврдени од Израел, кои се совпаѓаат со визијата на претседателот Трамп“.

Жителите рекоа дека израелските тенкови ја бомбардирале улицата Талатини, главна сообраќајница во центарот на градот Газа, по пораката на Трамп до Израел да ги запре нападите.

Според очевидци израелските воени авиони, го засилија бомбардирањето во Газа еден час откако Хамас го издаде своето соопштение, погодувајќи неколку куќи во населбата Ремал.

Имаше напади и во Кан Јунис, но според локалното население, немаше пријавени жртви.

Притисок врз Нетанјаху

Пред најновите израелски најави, семејствата на оние што Хамас ги држеше како заложници во Газа го повикаа Нетанјаху „веднаш да нареди преговори за враќање на сите заложници“.

На домашен план, премиерот е заглавен помеѓу растечкиот притисок за прекин на војната – од семејствата на заложниците и јавноста изморена од војна – и барањата на тврдокорните во неговата крајно десничарска коалиција, кои инсистираат дека не смее да има попуштање во израелската кампања во Газа.

Израел ја започна офанзивата во Газа по нападот на Хамас врз Израел на 7 октомври 2023 година, во кој околу 1.200 луѓе беа убиени, а 251 беа земени како заложници во Газа, според израелските бројки. Израел тврди дека се уште се 48 заложници, од кои 20 се живи.

Во воената кампања на Израел загинаа повеќе од 66.000 луѓе во Газа, повеќето од нив цивили, според здравствените власти во Газа. Нападот уништи голем дел од Појасот, додека ограничувањата за помош предизвикаа глад во некои делови од Газа, а условите се катастрофални низ енклавата.

Истражната комисија на Обединетите нации (ОН) и бројни експерти за човекови права заклучија дека Израел извршил геноцид во Газа. Владата на Нетанјаху тврди дека дејствувала во самоодбрана.

Хамас, во копија од одговорот што ја виде Ројтерс, не наведува дали ќе се согласи на разоружување и демилитаризација на Газа – нешто што Израел и САД го бараат, а кое претходно го отфрлија.

Тој, исто така, не го прифати фазното повлекување на Израел, наспроти неговото барање за целосно и итно повлекување.

Висок функционер на Хамас изјави за Ал Џезира дека групата нема да се разоружа додека не заврши окупацијата на енклавата од страна на Израел, нагласувајќи го јазот меѓу страните.

Катар започна координација со Египет и САД, кои посредуваат во продолжувањето на разговорите за планот на Трамп за Газа, изјави портпарол на Министерството за надворешни работи на Катар за мрежата X.

Планот на Трамп повикува на итно прекинување на огнот, размена на сите заложници што ги држи Хамас за палестински затвореници во Израел, постепено повлекување на Израел од Газа, разоружување на Хамас и воспоставување преодна влада предводена од меѓународно тело.

Остануваат спорни прашања

Во својот одговор на планот на Трамп, Хамас рече дека „ги цени арапските, исламските и меѓународните напори, како и напорите на американскиот претседател Доналд Трамп, кој повикува на крај на војната во Појасот Газа, размена на затвореници и итно внесување помош“, меѓу другите услови.

Тој, исто така, објави дека го објавува своето „одобрување за ослободување на сите затвореници од окупацијата – и живи и мртви – во согласност со формулата за размена содржана во предлогот на претседателот Трамп, со потребните теренски услови за спроведување на размената“.

Но, Хамас додаде: „Во овој контекст, движењето ја потврдува својата подготвеност веднаш да влезе во преговори, преку медијатори, за да ги разговара деталите“.

Групата рече дека е подготвена „да ја предаде администрацијата на Појасот Газа на палестинско тело на независни (технократи) врз основа на палестинскиот национален консензус и со поддршка на арапските и исламските земји“.

Хамас не даде до знаење дали ќе го прифати предлогот на Трамп да му се забрани политичка активност во Газа. Но, тој нагласи дека треба да биде „вклучен и да придонесе“ во секоја палестинска национална дебата за иднината на Газа.

Хамас претходно понуди да ги ослободи сите заложници и да ја предаде администрацијата на Појасот Газа на друго тело.

Порано во петокот, Трамп предупреди дека во Газа ќе се случи „пекол“ ако Хамас не го прифати неговиот предлог за енклавата до 18 часот по источно време.

Хамас не учествуваше во преговорите што доведоа до предлогот на Трамп.