Трамп не ја исклучува можноста за употреба на копнени трупи во војната со Иран

Американскиот претседател Доналд Трамп денес изјави дека не ја исклучува можноста за употреба на копнени трупи во војната со Иран, во момент кога американско-израелската воена операција влезе во трет ден, а Пентагон предупреди дека конфликтот може да донесе и нови американски жртви. Според објавата што ја пренесува CBS News, Трамп рекол дека нема однапред да ја затвори таа опција ако таков потег, според Белата куќа, стане неопходен.

Во извештајот на CBS News се наведува дека Трамп, изјавил оти „веројатно“ нема потреба од американски војници на терен, но дека би ја разгледал таа можност „ако бидат неопходни“. Со тоа, американскиот претседател испрати сигнал дека администрацијата не сака јавно да си постави цврсти ограничувања за следните чекори во операцијата против Иран.

Паралелно со таа изјава, американскиот секретар за одбрана Пит Хегсет на брифинг во Пентагон изјави дека во моментов нема американски копнени трупи во Иран, но одби да прецизира до каде би можеле да одат САД во натамошната ескалација. Тој рече дека операцијата, според американската страна, има јасна цел и не треба да се претвори во долга војна по примерот на Ирак, иако призна дека се очекуваат нови загуби.

Ројтерс, пак, објави дека Трамп претходно соопштил оти борбените операции во Иран ќе продолжат сè додека Вашингтон не оцени дека ги постигнал своите цели. Во меѓувреме, CBS News и AP објавија дека четворица американски војници се потврдени како загинати, што дополнително ја зголемува тежината на дебатата во САД околу тоа дали конфликтот може да прерасне во подолга и поширока воена интервенција.