Трамп: САД и Индија постигнаа трговски договор, Моди вети дека ќе купува американска нафта

Претседателот на Соединетите Американски Држави, Доналд Трамп, денес објави дека разговарал со индискиот премиер Нарендра Моди, наведувајќи дека е постигнат трговски договор меѓу двете земји и дека Индија се согласила да престане да купува руска нафта.

„Од пријателство и почит кон премиерот Моди и на негово барање, со стапување на сила веднаш, се согласивме за трговски договор меѓу Соединетите Американски Држави и Индија, со кој Соединетите Американски Држави ќе наплаќаат намалена реципрочна царина, намалувајќи ја од 25 проценти на 18 проценти“, рече Трамп на својата социјална мрежа Truth Social.

Американскиот претседател напиша и дека една од темите на разговорот била војната во Украина и дека, во овој поглед, Моди се согласил Индија да престане да купува руска нафта и да го зголеми увозот на енергетски производи од Соединетите Американски Држави, а потенцијално и од Венецуела, што, според него, би можело да придонесе за завршување на војната во Украина.

Според изјавите на Трамп, Индија се обврзала да ги намали своите тарифи и нетарифни бариери за американските производи на нула, како и значително да го зголеми купувањето на американски стоки како дел од политиката „Купувајте американско“.

Трамп додаде дека станува збор за купување на американски енергетски, технолошки, земјоделски и други производи во вредност од повеќе од 500 милијарди долари.

Тој процени дека односите меѓу САД и Индија ќе бидат дополнително зајакнати во наредниот период, нагласувајќи дека тој и премиерот Моди „постигнуваат резултати“.