Три од пет видови птици во светот се загрозени

Повеќе од половина од сите видови птици во светот бележат пад на бројноста, покажува новата глобална проценка на биолошката разновидност. Научниците предупредуваат дека 61% од анализираните видови се со намалена популација, што претставува драстично зголемување во однос на пред девет години, кога овој процент изнесувал 44%.

Главните причини се крчењето на шумите, ширењето на земјоделството и урбанизацијата, кои уништуваат природни живеалишта низ целиот свет – од Мадагаскар до Средна Америка. Птиците имаат клучна улога во екосистемите, преку опрашување, ширење семиња и контрола на штетници, па нивниот пад може да има сериозни последици за рамнотежата во природата.

„Фактот дека три од пет видови птици во светот имаат опаѓачка популација покажува колку е длабока кризата на биодиверзитетот и колку е итно владите да дејствуваат“, изјави д-р Ијан Бурфилд од организацијата BirdLife International.

И покрај мрачните податоци, научниците истакнуваат дека успешни примери на заштита постојат – бројот на зелени морски желки пораснал за 28% од 1970-тите години, благодарение на подобра заштита на местата за гнездење.

Но, од друга страна, арктичките фоки се на работ на исчезнување поради топењето на мразот и губење на живеалишта, што директно влијае и врз популацијата на поларни мечки.

„Нивната судбина е остар потсетник дека климатските промени не се далечен проблем – тие се случуваат сега и тука“, предупреди д-р Кит Ковакс од Норвешкиот поларен институт.