Skip to content
Словенија ја погоди снежна лавина утринава околу 10 часот, под врвот Тоск во Јулиските Алпи, при што исчезнаа тројца хрватски планинари. Спасувачката акција е во тек, а во неа учествуваат словенечката полиција и Горската служба за спасување (ГСС).
Според информациите од Полицијата во Крањ, тројцата исчезнати биле дел од група што престојувала во Водниковиот дом на Велом Полју. Додека четворица останале во планинарскиот дом, тројца од нив продолжиле со искачување и покрај предупредувањата за лоши временски услови.
На терен се распоредени три тима на словенечката ГСС – од станиците во Бохињ, Јесенице и Радовљица. Вклучени се и кучиња трагачи, а акцијата се координира од командниот центар на ГСС Бохињ.
Потрагата се одвива во исклучително тешки услови – на планината врнат дожд и снег, со висок ризик од нови лавини. Поради тоа, хеликоптерот за спасување засега не може да полета.
Словенија утрово ја зафати студен бран, при што снежната граница се спушти на околу 800 метри надморска височина. Според податоците на словенечкиот метеоролошки институт (АРСО), на Кредарица се измерени 25 сантиметри нов снег, на Зеленци 19, на Вогел 17, на Вршиќ 14 и на Крвавец 11 сантиметри.
Полицијата најави дека во текот на денот ќе бидат објавени нови информации за текот на спасувачката акција.