Украина откри голема корупција при набавката на оружје

Службата за безбедност на Украина соопшти дека открила корупција при набавката на оружје од страна на војската во вредност од околу 40 милиони долари.

СБУ соопшти дека пет лица од висок ранг во Министерството за одбрана и од страната на добавувачот на оружје се под истрага.

Се вели дека претставниците на одбраната потпишале договор за 100.000 минофрлачки гранати во август 2022 година, јавува Би-Би-Си.

Плаќањето било извршено однапред, некои средства биле префрлени во странство, но оружјето никогаш не било испорачано.

Корупцијата е главната пречка во обидот на Украина да се приклучи на Европската унија.

СБУ соопшти дека истрагата ги разоткрила претставниците на Министерството за одбрана и менаџерите на добавувачот на оружје „Лавов Арсенал“, „кои украле речиси 1,5 милијарди гривни при купувањето гранати“.

„Според истрагата, во измамата биле вмешани поранешни и сегашни високи функционери на Министерството за одбрана и раководители на поврзани компании“, се вели во соопштението.

СБУ соопшти дека и покрај договорот за гранати што е договорен шест месеци откако Русија ја започна својата целосна инвазија врз Украина, ниту една артилериска граната не била испратена.

Еден од осомничените е уапсен додека се обидувал да ја напушти Украина и моментално се наоѓа во притвор, соопшти СБУ.

Главниот обвинител на Украина соопшти дека украдените средства се конфискувани и ќе бидат вратени во буџетот за одбрана.

Проблемите околу корупцијата ја следат Украина со години. Украинскиот претседател Володимир Зеленски ја стави борбата против корупцијата како еден од неговите врвни приоритети кога дојде на власт во 2019 година.

Последните обвинувања доаѓаат откако републиканците во САД ги отфрлаат напорите на претседателот Џо Бајден да испрати поголема помош за Украина.

Министерот за одбрана Олексеј Резников беше сменет минатиот септември поради различни обвинувања за корупција и покрај тоа што уживаше солидна репутација дека ја претставува Украина во нејзините разговори со западните сојузници.

Иако се тврди дека тој лично не е вмешан во корупција, неколку случаи ја погодија армијата под негово раководство, еден за обезбедување храна на војниците, друг за набавка на соодветна облека за војниците.

Украина беше рангирана на 116-то место од 180 земји според Индексот на перцепција на корупцијата за 2022 година што го спроведува истражувачката организација Транспаренси интернешнал.

Но, антикорупциските напори почнуваат да носат промени. Таа е една од само 10-те земји кои постојано се искачуваат на ранг-листата на Транспаренси Интернешнл, искачувајќи се за 28 места за десет години.

Г. Т.