Украина: Соборени сите дронови со кои Русија го нападна Киев синоќа

Украинските медиуми објавија дека силите за противвоздушна одбрана ги пресретнале сите беспилотни летала со кои Русија се обидела да го нападне Киев синоќа.

Остатоци од пресретнатите дронови паднале во две области на главниот град на Украина, а според медиумите повеќето руски беспилотни летала пристигнале од североисток, приближувајќи се кон Киев од различни страни.

Двапати во текот на ноќта се огласиле сирените за воздушна тревога, со вкупно траење од пет и пол часа.

Во квартот Шевченко во Киев, остатоците од соборените дронови ја оштетија површината на патот, уличното осветлување и инфраструктурата за пренос на електрична енергија. Најмалку пет згради имале скршени прозорци и врати од ударниот бран.