Украинците напаѓаат длабоко во Русија, Зеленски наговести дека користат ново оружје

Украинскиот претседател Володимир Зеленски наговести дека Украина почнала да користи не само беспилотни летала, туку и свои ракети Фламинго со долг дострел за напади врз цели на оддалеченост до 3.000 километри во Русија, пишува Киев Пост.

На заедничката прес-конференција со холандскиот премиер Дик Шуф ​​во Киев, Зеленски го истакна растечкиот дострел на украинските напади, велејќи дека неодамнешните снимки што кружат на социјалните мрежи овозможуваат да се разликуваат нападите со беспилотни летала од оние извршени од други системи.

„Од тие фрагменти што се на социјалните мрежи, можете да видите каде биле користени беспилотни летала, а каде не“, рече Зеленски, како што објави РБЦ-Украина.

Тој одби да даде оперативни детали за да не бидат „подготвени“ руските сили за украинските тактики. Тој повтори дека приближно 60 проценти од нападите длабоко во Русија биле извршени од украински беспилотни системи, кои, според него, можат да достигнат цели на оддалеченост до 1.500 километри.

Ракетата со долг дострел „Фламинго“

Коментарите на Зеленски дојдоа откако „Економист“ објави дека Киев можеби почнал да користи нова класа крстосувачки ракети со долг дострел, идентификувани како „ФП-5 Фламинго“. Станува збор за нова украинска субсонична крстосувачка ракета чиј дострел и големина ја прават една од најголемите во својата класа.

Ракетата, која наводно е успешно тестирана во последните месеци, има дострел од 3.000 километри, што ѝ овозможува да напаѓа длабоко во Русија, дури и надвор од Урал, во азиските делови на земјата. „Економист“ наведува дека „ФП-5“ може да лета на мала надморска височина од околу 50 метри и да носи боева глава со тежина од 1.150 кг. Доколку се потврди, таквото оружје би можело значително да ја зголеми деструктивната моќ на украинската ударна кампања против длабоки цели.

Како главна платформа за напади досега, „Економист“ ги опиша беспилотните летала „Фаер Поинт“ ФП-1. Овие системи наводно имаат помали боеви глави, но можат да достигнат цели на околу 1.500 км оддалеченост и да користат софистициран софтвер отпорен на интензивно електронско војување.

„Киев пост“ побара од Генералштабот на Украина потврда за извештаите за ракетата „Фламинго“, но беше кажано: „Не, во моментов немаме такви информации“. Интересно е што, според „АП њуз“, повикувајќи се на експерти од индустријата, ракетата го добила името „Фламинго“ откако првата серија се покажала како розова поради производствени дефекти.

Планови за зголемување на производството

Зеленски им се заблагодари на украинските вооружени сили и на домашните производители на одбранбената индустрија и најави дека во блиска иднина Киев очекува „големи можности“, кои ќе зависат од финансирањето. Тој изјави дека е реално да се планира производство на ракети и беспилотни летала во вредност од околу 35 милијарди долари до 2026 година, истакнувајќи ја мрежата од околу 30 билатерални договори како потенцијални извори на средства.

„Веруваме дека навистина ги зголемивме нашите можности“, рече тој. „Тој обем зависи од тоа дали ќе бидат достапни соодветни пари. Од каде би можеле да дојдат тие пари? За среќа, имаме 30 билатерални договори“.

Минатиот август, производителот на новите крстосувачки ракети „Фламинго“, со седиште во Киев, „Фајер Поинт“, објави дека неговиот моментален производствен капацитет е една ракета дневно, со цел до октомври да достигне седум дневно. Ирина Терех, менаџер за производство во „Фајер Поинт“, ги потврди моменталните и проектираните бројки за „АП њуз“. „Фајер Поинт произведува околу една ракета „Фламинго“ дневно, а до октомври се надеваат дека ќе изградат капацитет за производство на седум дневно“, рече Терех“, објави „АП њуз“.