Украински дронови удрија по руски градови: три жртви во Таганрог, повредени и во Краснодар

Ноќта кон вторник јужните региони на Русија станаа мета на еден од најмасовните напади со украински беспилотни летала досега. Краснодарскиот крај и Ростовската област, на брегот на Азовското и Црното Море, се разбудија со човечки жртви, ранети и сериозни оштетувања на станбени, индустриски и јавни објекти.

Во Ростовската област, гувернерот Јуриј Сљусар соопшти дека во нападот загинале три лица, а осуммина се повредени. Сите жртви се жители на Таганрог и на Неклиновскиот округ. Во самиот Таганрог биле оштетени две станбени згради, една приватна куќа, Машинскиот факултет, две индустриски компании и детска градинка, поради што локалните власти прогласија вонредна состојба на погодените подрачја.

Штетите не се ограничени само на градот. Во селата Петрушино и Весело-Вознесенка се пријавени оштетени приватни имоти, избувнал пожар, а на едно место била зафатена и надворешна гасоводна цевка, што предизвикало ново запалување. Според руското Министерство за одбрана, системите за противвоздушна одбрана над Ростовската област собориле 16 украински дронови, но дел од беспилотните летала сепак успеале да погодат цели на терен.

Локалната власт во Таганрог реагираше со воведување режим на вонредна состојба во зоните каде што има најголеми оштетувања. Градоначалничката Светлана Камбулова изјави дека во ударите, покрај станбените згради и приватните куќи, биле зафатени и образовни и индустриски објекти, вклучително и Детската градинка број 17, што дополнително ја зголемува вознемиреноста кај граѓаните.

Нападите продолжиле и јужно, кон Краснодарскиот крај. Гувернерот Вениамин Кондратјев потврди дека таму се повредени шест лица. Четворица од нив се од Новоросијск, каде што биле оштетени пет станбени згради и две приватни куќи. Во центарот на Краснодар, фрагменти од дронови биле пронајдени во близина на висококатница, а ударните бранови скршиле прозорци на неколку згради.

Во Туапсе, по падот на беспилотно летало се запалил кров на станбена зграда, но пожарникарите брзо го локализирале пожарот. Во истиот инцидент со шрапнели бил повреден чувар од соседна установа. Во Геленџик, пак, биле оштетени две приватни куќи, а повреден маж кој во моментот на ударот се наоѓал на улица – неговиот живот, според првичните информации, не е во опасност.

Министерството за одбрана на Русија соопшти дека над Краснодарскиот крај системите за ПВО собориле вкупно 76 дронови, што ја покажува размерот на нападот и фактот дека воздушниот фронт на војната одамна е проширен длабоко во руската територија. Додека Москва зборува за „терористички удари“, Киев официјално ретко ги коментира ваквите операции, но во украинската јавност се претставуваат како дел од стратегијата за нанесување штета на воената инфраструктура и логистиката на агресорот.