Skip to content
Унгарија и Словачка ќе ја оспорат одлуката за забрана на испорака на руска нафта и гас, која Европската комисија планира да ја стави на гласање следната недела, пред Судот на правдата на Европската унија, соопшти унгарскиот министер за надворешни работи и трговија, Петер Сијарто.
„Брисел сака следната недела да ја стави на гласање забраната за увоз на руска нафта и природен гас во Европа, што ќе ја оневозможи сигурната енергетска испорака за нашата земја и за Словачка, а ќе доведе и до нагло зголемување на цените“, напиша Сијарто на Фејсбук, пренесува Tass.
Тој истакна дека станува збор за „голема правна измама, бидејќи се работи за санкции кои можат да се донесат само единствено“.
Според неговите зборови, намерата на Европската комисија да прифати мнозинска, а не задолжителна единствена одлука за забрана на испораката на нафта и гас од Русија, „целосно е во спротивност со Договорот за Европската унија“.
Тој потсети и дека во Договорот за Европската унија се наведува дека „енергетската политика е национална одговорност“.
„Поради тоа, заедно со Владата на Словачка, веднаш по усвојувањето на таа одлука ќе поднесеме жалба до Европскиот суд на правдата и ќе побараме нејзино привремено суспендирање до судењето“, додаде Сијарто.
