Утре во 18 часот протест на „Ниту една повеќе“ во Скопје

Граѓанската иницијатива „Ниту една повеќе“ повикува на нов протестен собир и целосна блокада кај Паркот „Жена-борец“ во центарот на Скопје утре во 18 часот.

Организаторите велат дека излегуваат на улица поради серијата фемициди и хроничниот институционален неуспех да се заштитат жените од семејно и родово базирано насилство, со јасна порака: државата мора веднаш да преземе мерки што спасуваат животи.

Од иницијативата најавуваат дека блокадата ќе биде мирна, но решителна, и ги повикуваат граѓаните да дојдат и да им се приклучат. Акцијата ќе се одржи кај Паркот „Жена-борец“ (просторот меѓу Собранието, Владата и Камениот мост), со можни привремени пренасочувања на сообраќајот во поширокиот центар, за што организаторите апелираат на трпение и разбирање од возачите.

Протестот следи по низа јавни реакции и институционални најави за „нови мерки“, но и по оцени на стручната јавност дека постојните алатки за заштита се недоволно и нерамномерно применети. „Ниту една повеќе“ бара: функционални механизми за итна заштита, реална проценка на ризик, 24/7 СОС-линија, доволно капацитети во засолништата, е-нараквици и строг надзор за сторителите, забрзани постапки и санкции за институционален пропуст – како и транспарентност за секој случај каде имало пријави, а системот не реагирал навреме.

Организаторите најавуваат дека протестите ќе продолжат се додека не се донесат и спроведат мерки со рокови и одговорни институции – а јавноста ќе биде редовно информирана за следните чекори.

Граѓаните кои ќе се приклучат се повикуваат да понесат транспаренти и да останат мирни и дисциплинирани, со акцент на безбедноста на сите учесници.