Skip to content
Претставници на ЦИВИЛ денеска пред руската амбасада во Скопје, со протестно писмо по повод смртта на рускиот борец за демократија и човекови права, Алексеј Навални, се обратија до руските граѓанки и граѓани.
Некои од активистите на ЦИВИЛ носеа маички со ликот на Навални и слоганот Je suis Navalny, додека го читаа писмото насловено како „Отворено писмо до граѓанките и граѓаните на Руската Федерација“, пред руската амбасада во главниот град.
„Со тешко срце, жалиме за смртта на Алексеј Навални, лидер на борбата за демократија и човекови права, кој стана жртва на безмилосниот режим на еден геноциден диктатор. Иако телото на Навални подлегна на бруталноста на режимот, неговото наследство живее, овековечено во срцата и умовите на илјадници храбри руски граѓанки и граѓани кои, во чествувањето на неговиот живот, се соочуваат со бруталност и смрт од рацете на руската влада“, се вели во отвореното писмо на ЦИВИЛ.
Претставниците на ЦИВИЛ изјавија дека името на Навални и неговата неуморна борба за демократија и човекови права ќе опстојуваат во срцата и умовите на слободољубивите луѓе ширум светот, како и во Руската Федерација.
Според ЦИВИЛ, одговорноста за смртта на еден затвореник се наоѓа само и само во државата.
„Итно ги повикуваме руските власти да дозволат независна истрага за околностите на смртта на Алексеј Навални во сибирската казнена колонија“, порачува ЦИВИЛ.
Организацијата испорача и неколку барања, како што се ослободување на политичките затвореници во Русија, крај на војната против Украина, и изнесување на Путин пред меѓународната правда.
„Се придружуваме кон барањата за ослободување на сите политички затвореници во Русија! Ставете крај на полициската бруталност и угнетување врз граѓаните! Прекинете ја геноцидната војна против Украина! Прекинете ја хибридната војна против демократските нации! Одведете го Путин пред Меѓународниот суд на правдата да му се суди за неговите злосторства! , се вели во протестното писмо од ЦИВИЛ.
Откако го прочитаа писмото пред амбасадата, во присуство и на новинарки и новинари од две национални телевизии и неколку интернет медиуми, активистите ги ставија пораките во поштенското сандаче на амбасадата.
Една активистка положи и цвеќе, држејќи натпис на кој беше една од славните изјави на Навални:
„Ако решат да ме убијат, тоа значи дека сме неверојатно силни!“
Писмото беше прочитано на македонски, албански и англиски.
На новинарско прашање, претседателот на ЦИВИЛ, Џабир Дерала, објасни дека писмото е наменето за руските граѓанки и граѓани, но дека го упатуваат и до руските дипломати во Скопје. Тој повика на поддршка за протестите по повод убиството на Алексеј Навални.
Потоа, Дерала прочита и пораки со познати изјави од Навални.
„Нашата бедна, исцрпена татковина треба да се спаси. Ограбена е, ранета, вовлечена во агресивна војна и претворена во затвор управуван од најбескрупулозните и лажливи никаквеци.“
Алексеј Навални беше руски адвокат кој ја разоткриваше корупцијата и злоупотребата на моќта од страна на рускиот диктатор Владимир Путин и неговата клика. Тој беше главен предизвик за Путин повеќе од една деценија, наспроти постојаниот притисок од властите и речиси фаталното труење со „новичок“ во 2020 година. Неговиот живот згасна на 16 февруари во руската казнена колонија веднаш над Арктичкиот круг.
ЦИВИЛ го одржа настанот пред руската амбасада во Скопје во знак на солидарност и почит кон делото на Навални и крајна осуда на диктаторскиот режим на Путин.
М. Д. (ЦивилМедиа)
