Skip to content
СДСМ во објава на социјалните мрежи тврди дека во јавноста излегле повеќе фотографии на премиерот Христијан Мицкоски со лице со иницијали С.З., кое партијата го идентификува како „Симе“ и за кое наведува дека било уапсено со поголема количина дрога, оружје, муниција и пари.
Според партијата, откако ВМРО-ДПМНЕ во првичните реакции тврдела дека станува збор за „само една фотографија“, подоцна се појавиле дополнителни снимки и фотографии, по што, како што наведуваат од СДСМ, следел молк и од партијата и од институциите.
Во истата објава СДСМ тврди дека „свиркачи“ до нивната антикорупциска линија доставиле видео на кое се гледа како истото лице пука со автоматско оружје – калашников – на собир на кој, според нив, се забележуваат знамиња на ВМРО. СДСМ оценува дека самото поседување автоматско оружје е незаконско, а пукањето во присуство на луѓе претставува сериозен безбедносен ризик и бара итна институционална реакција.
Партијата соопшти дека во јавноста се избегнува одговор на прашањето каква е поврзаноста меѓу Мицкоски, ВМРО-ДПМНЕ и лицето за кое зборуваат во објавата, тврдејќи дека ваквото однесување е можно само ако постои политичка заштита.