Skip to content
Владата одобри квота од 10.000 работни дозволи за странски државјани за 2026 година, со одлука што стапува во сила од 16 јануари. Од вкупната бројка, 9.750 дозволи се наменети за редовно вработување, 200 за упатени странци, а 50 за сезонски ангажмани. Во рамки на редовното вработување, 4.500 се предвидени за нови работници, додека 5.250 се за продолжување на дозволите на странци кои веќе работат во земјава.
Од Министерството за економија и труд најавуваат дека ќе ја следат искористеноста на квотата и состојбите на пазарот на труд. Како индикатор за растечкиот тренд, минатата година Агенцијата за вработување издала 8.509 позитивни мислења за дозволи за работа, додека Министерството за внатрешни работи издало 6.128 дозволи за престој на странски работници. Бизнис-заедницата подолг период бара зголемување на квотите, аргументирајќи дека недостигот од работна сила станува структурен проблем за дел од секторите.
Иако квотата се отвора како одговор на потребите на компаниите, таа неминовно ја активира и другата страна од равенката: колку пазарот може да апсорбира увоз на труд, без притисок врз платите и условите за работа, и со доволно силни механизми за контрола и заштита на работничките права. Законски, квотата за вработување на странци не смее да надмине 5% од вкупното работоспособно население; според податоци на Државниот завод за статистика, во третиот квартал од 2025 година имало околу 705 илјади вработени и речиси 92 илјади невработени. Во исто време, најголем интерес за ангажман на странци во последниве години се забележува во градежништвото, преработувачката индустрија, сместувањето и послужувањето храна, како и трговијата.
Контекстот покажува дека квотите растат со години: претходно изнесувале 3.250, потоа биле зголемени на 7.000 кон крајот на 2023 година, а за 2025 година биле утврдени 10.000 дозволи. Европската комисија нотира дека во 2024 година биле издадени околу 8.900 работни дозволи за странски работници. Дополнително, со измените на регулативата се отвора простор дел од работните ангажмани на стратешки проекти да се одобруваат и надвор од годишната квота, што ја прави реалната бројка на странски ангажмани потенцијално повисока од формално утврдената.