Skip to content
Татијана Шлосберг, внуката на поранешниот американски претседател Џон Ф. Кенеди и ќерка на Каролин Кенеди, почина денеска, 30 декември 2025 година, на 35-годишна возраст. Веста беше соопштена преку објава на социјалните мрежи од Фондацијата на претседателската библиотека и музеј „Џон Ф. Кенеди“, со кратка порака дека „нашата прекрасна Татијана почина утрово“ и дека „секогаш ќе биде во нашите срца“.
Шлосберг во ноември годинава јавно откри дека ѝ е дијагностицирана акутна миелоидна леукемија со ретка мутација – агресивен карцином на крвта и коскената срцевина. Во есето објавено во „Њујоркер“, таа го опиша почетокот на болеста: по раѓањето на второто дете во мај 2024 година, лекар забележал високи вредности на бели крвни клетки, по што следеле дијагноза, хемотерапии, две трансплантации на матични клетки и клинички испитувања. Истото сведоштво беше прочитано и како тивок судир со политиката, затоа што во него Шлосберг ги критикуваше одредени здравствени политики во САД, предупредувајќи дека кратењата во истражувања и програми најчесто ги погодуваат пациентите кога се најранливи.
Јавноста во САД ја познаваше како новинарка за клима и животна средина, со текстови и репортажи поврзани со климатските промени, а пошироко и по книгата „Inconspicuous Consumption“, која ја отвораше темата за „невидливиот“ еколошки отпечаток во секојдневните навики. Во семејството Кенеди, таа беше средното од трите деца на Каролин Кенеди и Едвин Шлосберг, со братот Џек и сестрата Роуз.
Смртта на Шлосберг повторно ја враќа семејната биографија што американските медиуми со децении ја нарекуваат „проклетството на Кенеди“: од атентатот врз Џон Ф. Кенеди во 1963, преку убиството на Роберт Кенеди во 1968, до низа подоцнежни трагедии што ја следат оваа политичка династија. Овојпат, трагедијата е тивка и приватна – битка со болест што таа самата ја направи јавна со цел да остави трага и сведоштво, а не сензација.