Skip to content
По обилните врнежи што ја погодија Албанија, поплавени се околу 1.000 домови и повеќе од 1.500 хектари земјоделско земјиште, а стотици семејства се евакуирани. Најтешко погодени се регионите Лежа, Пешкопје, Фиер, Берат, Корча, Ѓирокастра и Влора, каде надојдените реки и силните дождови предизвикаа големи проблеми на терен.
Министерот за одбрана Пиро Венгу изјави дека се спроведени претежно привремени евакуации:
- во Влора – 52 семејства
- во Корча – 18 семејства
- во другите региони – неколку семејства
Според официјалните податоци:
- во Лежа се поплавени 600 домови,
- во Корча 300,
- во Влора 52,
- во Фиер 25.
Регистрирана е и една жртва во село близу Девол. Оштетени се околу 20 мостови, од кои дел ќе треба да бидат целосно реконструирани. Венгу додаде дека внимателното управување со Дримската каскада, каде се трите најголеми хидроелектрани, е клучно за избегнување потенцијално катастрофални поплави во Скадар.
Албанската армија е на терен и учествува во операции за спасување, евакуација, дистрибуција на храна и зајакнување на насипите и браните.
