Во Шпанија на сила ЗАБРАНА за пушење на плажи и тераси

Шпанската влада го усвои нацрт-законот кој предвидува големи ограничувања за пушењето на јавни простори – промена што може сериозно да го смени искуството на милиони туристи што ја посетуваат земјата секоја година.

Со законот би се забранило пушењето и користењето на електронски цигари на плажи, спортски објекти, тераси во ресторани и барови, како и на детски игралишта и автобуските станици.

„Секој има право да дише чист воздух и да живее подолг и поздрав живот“, изјави министерката за здравство Моника Гарсија.

Иако целта е заштита на јавното здравје, угостителите реагираат дека мерката ќе ја погоди традицијата на јадење и дружење на отворено, која е дел од шпанската култура.

Пушењето во затворени простории во Шпанија е забрането уште од 2011 година, но оваа нова мерка би значела дополнително ограничување за љубителите на тутунот.

Законот сè уште треба да помине во парламентот и може да претрпи измени, но ако биде усвоен, Шпанија ќе им се придружи на земјите како Франција кои веќе забранија пушење на голем дел од јавните простори.

Според официјалната статистика, болестите поврзани со тутун одземаат повеќе од 50.000 животи годишно во Шпанија.