Во технолошко индустриските развојни зони нови 4800 вработувања

Во текот на изминатиот период, фактите говорат дека врз основа на политиките што ги имаме за зголемување и на инвестициите и на бројот на работници, има нови 4800 вработени во технолошко – индустриските развојни зони ширум државата, а вкупниот број достигна од 17790, што е рекордно ниво на вработени во странските инвестиции што работат во технолошко индустриските развојни зони, истакна денеска премиерот Димитар Ковачевски, кој заедно со заменик-министерот за финансии Филип Николоски, беше во посета на компанијата „Вабтек МЗТ“ АД Скопје.

– Видовме многу енергија, ентузијазам, стручни работници, меѓутоа пред сѐ видовме една исклучително висока технологија, што може единствено да се види во фабрики во Англија, Франција, САД и тука, во Скопје, изјави Ковачевски пред медиумите.

Тој нагласи дека политиката на Владата е многу јасна. Таа е насочена, како што додаде, пред сѐ кон економски развој на општеството, создавање услови за отворање нови работни места, европска ориентација со цврсто зачувување на нашите национални интереси.

– Дека Северна Македонија индустриски се развива, дека економијата расте, тоа не е резултат само на работата на Владата, нормално и на институциите, но, пред сѐ, на вакви компании што инвестираат во високо технолошко индустриско производство што се продава на светските пазари, рече премиерот Ковачевски.

„МЗТ“ е основан пред повеќе од 75 години, а од 2008 година станува дел од „Вабтек“ корпорација. „Вабтек“ е резултат на спојување на три индустриски компании и со себе носи повеќе од 150 години историја во железничкиот бизнис.

Беше кажано дека каде што има воз, метро, локомотива во светот, таму е присутен „Вабтек“.

Дарио Кардоне, генерален директор на „Вабтек МЗТ“ АД Скопје, рече дека токму од овде, Северна Македонија, клучна земја за глобалните операции на „Вабтек“ и нивните клиенти, системите за сопирање произведени во „МЗТ“, успешно стигнале до Њујоршкото метро, познатиот „Ориент експрес“, Кина, Индија, Пакистан.

– МЗТ со гордост вработува повеќе од 370 висококвалификувани луѓе, а до 2026 година се очекуваат дополнителни 100 вработувања. Во последните четири години инвестирани се над 10 милиони евра, додавајќи нови најсовремени CNC машини, нови производни линии и нов систем за дигитализација. Да бидам искрен, не можам да ги негирам предизвиците во оваа брзорастечка средина, меѓу нив, достапноста на квалификувана работна сила, како и потребата од капацитети од светска класа кои би го поддржале нашиот раст. Што се однесува до човечкиот капитал, „МЗТ“ користи различни начини за да го надмине овој предизвик, меѓу кои и формирање на тренинг центар за обука за ЦНЦ машини, стипендии за средношколци, овозможена практикантска работа за студенти, како и низа тековни активности за регрутирање на квалификувани ЦНЦ оператори, појасни Кардоне.

Тој додаде дека различни активности во рамките на нивната иницијатива „Ние се грижиме“ се развиени за да се поддржи добробитот на луѓето од „МЗТ“ и заедницата околу нив, од донации во кампања за превенција на дојка, до донации на компјутерска опрема на локални училишта и многу други различни социјални иницијативи во соработка со нивниот синдикат.

Беше кажано и оти проектот за нова фабрика е во тек.