Во Венецуела уапсени 12 лица во врска со пожарите

Вкупно 12 лица се уапсени во врска со пожарите што ги опустошија шумите во северниот дел на Венецуела погодена од топлотен бран, изјави доцна синоќа министерот за животна средина Хозуе Лорка додавајќи дека пожарите се под контрола.

– Во Арагава, на север, уапсени се седум лица, во Мерида, на запад, пет, изјави Лорка за јавниот канал ВТВ, во првата проценка по неколку недели извештаи за шумски пожари во најмалку пет области низ Венецуела.

Лорка додаде дека пожарите се „успешно“ изгаснати и оти нема жртви но повредени се пожарникари кои го гаснеле огнот.

Министерот рече дека пожарите уништиле 900 од 107.000 хектари на национален парк.

Пламените јазици стигнаа и до седиштето на Министерството за транспорт во Арагва, каде беа уништени 112 автобуси.

Надлежните сметаат дека се работи за „планирано кривично дело“.