Skip to content
Тадија Пантиќ (23), за кого српските медиуми пишуваат дека е водач на навивачите на белградски Партизан од Земун, утрово беше застрелан во Нов Белград. Неговото тело, со бројни повреди на главата, било пронајдено на тревник зад трафика покрај прометна улица, а полицијата веднаш го обезбедила местото и започнала увид.
Според првичните информации, Пантиќ бил убиен од двајца напаѓачи кои пристигнале на скутер без регистарски таблици и побегнале од лице место пред да пристигне полицијата. Српскиот весник „Новости“ објави дека осомничените се уште се во бегство и дека истрагата се фокусира на можни мотиви поврзани со судири меѓу навивачки и криминални групи.
Медиумски извор за „Новости“ потсетува дека Пантиќ двапати претходно избегнал сигурна смрт. Во јуни годинава, тој бил меѓу навивачите на Партизан кои се враќале од кошаркарски натпревар, кога на белградската сообраќајница Газела колона автомобили била нападната од лица на скутери. Камерите снимиле како напаѓачите ги опколуваат возилата и пукаат кон нив, а Т.П. се наоѓал во едно од автомобилите, но тогаш успеал да помине без фатални последици.
Истите извори го поврзуваат Пантиќ и со трагичната експлозија на улицата Косовска во центарот на Белград, кога на 30 септември загина 21-годишниот македонски модел М.С. Според оперативните информации што ги пренесуваат српските медиуми, М.С. наводно бил ангажиран да го убие водачот на навивачите на Партизан, но експлозивот, како што се сомнева, го активирал во самиот изнајмен стан, при што загинал.
Полицијата сега ги поврзува настаните во поширок контекст на ескалација на судирите меѓу организирани групи во Белград, во кои навивачките структури неформално се преклопуваат со нарко-пазарот и други криминални активности. Убиството на улица, извршено со скутер без таблици и брзо исчезнување на напаѓачите, упатува на внимателно планирана ликвидација, а не на спонтан конфликт. Официјално, надлежните органи се воздржани од детали и најавуваат дека истрагата ќе ја утврди поврзаноста на претходните напади и можните нарачатели.
Случајот дополнително ја вознемири јавноста во Србија, бидејќи се надоврзува на серија насилни инциденти во Белград – од улични пресметки, преку пукања во кафулиња, до бомбашки напади во станбени згради. За граѓаните, убиството на млад човек, кој во медиумите се претставува како водач на навивачка група, станува уште еден симбол на спојот меѓу спортот, улицата и криминалот, во кој институциите тешко успеваат да воспостават контрола.
