Врнежите ја спасуваат Преспа, нивото порасна за рекордни 48 см

По месеци на алармантно опаѓање, Преспанското Езеро бележи охрабрувачки пораст на водостојот. На почетокот на декември нивото на езерото се зголемило за 20 сантиметри, а со последните обилни врнежи од дожд нивото се подигна за вкупно 48 сантиметри за само два месеца.

Документарецот објавен на Рацин детално објаснува дека причините за порастот се исклучиво природни: Преспанското Езеро нема притоки или реки кои континуирано го полнат, што значи дека евентуалните врнежи се единствената сила што може да го подигне нивото на водата. Овој дождовен период, и покрај предизвиканите поплави на некои места, се покажува како спас за Преспа и природата во регионот.

Според мерењата на мерната станица во Наколец, на 8 јануари 2026 година водостојот изнесувал 841,36 метри надморска височина, додека на 7 ноември 2025 година бил 840,88 метри. Во првиот месец од периодот нивото пораснало за 27 сантиметри, а во наредните недели дополнителни 21 сантиметар.

Преспанското Езеро со децении се соочува со сериозно повлекување на водата, кое започнало по историскиот максимум во 1963 година кога нивото достигнало 851,83 метри. Причините за опаѓањето се комбинација од климатски промени, прекумерно користење на водните ресурси и природно понирање на езерото.

Најновиот пораст на водостојот внесува умерен оптимизам дека обновата на езерото е возможна. Преспанското Езеро е заштитен природен споменик, со огромно значење за биолошката разновидност и претставува едно од најстарите зачувани тектонски езера во светот, со старост поголема од пет милиони години.

Сега засега, врнежите се спасот за Преспа – природата покажува дека може да ја врати рамнотежата.