Skip to content
Во четири од десет скопски општини и во Град Скопје денеска се гласа за градоначалник во втор круг од локалните избори. Граѓаните избираат меѓу кандидатите во Аеродром, Карпош, Центар и Шуто Оризари, како и за првиот човек на главниот град. Шест скопски општини завршија уште во првиот круг, а тројца актуелни градоначалници — на Бутел, Гази Баба и Ѓорче Петров — добија втор мандат.
Во трката за Град Скопје се Орце Ѓорѓиевски (ВМРО-ДПМНЕ и Коалицијата) и Амар Мециновиќ (Левица). Во првиот круг Ѓорѓиевски освои 91.663 гласа или 39,41 отсто, а Мециновиќ 30.665 гласа или 13,18 отсто. Тогаш за скопски градоначалник гласале 232.581 граѓанин, што е излезност од 49,04 проценти. Во вториот круг право на глас имаат 474.304 избирачи запишани на 685 избирачки места.
Аеродром влегува во втор круг со дуел меѓу актуелниот градоначалник Дејан Митески (ВМРО-ДПМНЕ и Коалицијата) и Александар Трајановски (СДСМ и Коалицијата). Митески во првиот круг доби 16.257 гласа или 49,11 проценти, а Трајановски 6.881 глас или 20,78 проценти. Во општината се регистрирани 68.772 избирачи; излезноста во првиот круг беше 48,14 проценти или 33.106 гласачи.
Во Карпош се соочуваат Сотир Лукровски (ВМРО-ДПМНЕ и Коалицијата) и актуелниот градоначалник Стевчо Јакимовски (ГРОМ, Коалиција „Искуство за успех“). Лукровски освои 10.284 гласа или 34,51 процент, Јакимовски 8.761 глас или 29,40 проценти. Право на глас имаат 56.856 избирачи, а првиот круг забележа излезност од 52,42 проценти или 29.803 гласачи.
Во Центар, актуелниот градоначалник Горан Герасимовски (СДСМ и Коалицијата) оди во втор круг против Мирослав Лабудовиќ (Движење ЗНАМ). Герасимовски собра 8.535 гласа или 38,19 отсто, Лабудовиќ 5.707 гласа или 25,54 отсто. Општината има 44.109 запишани избирачи; на првиот круг излезноста изнесуваше 50,66 проценти или 22.347 гласачи.
Во Шуто Оризари се гласа меѓу актуелниот градоначалник Курто Дудуш (Унија на Роми) и Ерџан Демир (ВМРО-ДПМНЕ и Коалицијата). Дудуш во првиот круг доби 3.223 гласа или 36,43 проценти, а Демир 1.841 глас или 20,81 процент. Во избирачкиот список се впишани 23.893 гласачи, со забележана излезност од 37,03 проценти на првиот круг.
