Вучиќ очекува одговор од OFAC до петок за НИС: „Не гледам пречка лиценцата да биде продолжена“

Претседателот на Србија, Александар Вучиќ, изјави дека очекува Канцеларијата за контрола на странски средства на САД (OFAC) најдоцна до петок да одговори на барањето на Нафтната индустрија на Србија (НИС) за продолжување на оперативната лиценца.

Изјавата Вучиќ ја даде на маргините на Светскиот економски форум во Давос, нагласувајќи дека постои реална основа Американците да дадат зелено светло, имајќи го предвид постигнатиот прелиминарен договор меѓу „Газпромнефт“ и унгарската компанија МОЛ.

„Очекуваме одговор денес, утре или најдоцна до петок. Сметам дека нема пречка лиценцата да биде продолжена до финализирање на договорот. Сите клучни елементи се веќе договорени, нема ништо скриено“, изјави Вучиќ.

„Го направивме сѐ што беше побарано“

Вучиќ нагласи дека Србија ги испочитувала сите барања поврзани со трансакцијата и дека не гледа причина зошто OFAC не би дал одобрение.

„Сѐ што побараа од нас – го направивме. Не гледам причина зошто оперативната лиценца да не биде продолжена додека не се затвори договорот“, рече српскиот претседател.

Тој се осврна и на критиките дека влезот на унгарскиот МОЛ во сопственичката структура на НИС е спорен потег, особено поради искуствата на Хрватска со таа компанија.

„Некои гледаат од хрватски агол. Јас гледам од српски. Прашањето е – која беше алтернативата? Да влеземе во судир со Русија? Да ја конфискуваме нивната сопственост? Да ги нарушиме односите што ги градевме со децении?“, праша Вучиќ.

„Не добивме сѐ, но ја зачувавме стабилноста“

Вучиќ призна дека Србија не успеала да стане мнозински сопственик на НИС, но нагласи дека државата успеала да ја зачува стабилноста и да избегне санкции.

„Не добивме сѐ што сакавме. Но ја зачувавме стабилноста, го почитувавме руското право на сопственост и ќе го зголемиме учеството на Србија во иднина“, рече тој.

Тој остро реагираше и на домашните критики, оценувајќи ги како неосновани и политички мотивирани.

„Наместо да понудат решение, некои политичари и аналитичари држат лекции. Јас се борам да ги поправам грешките што други ги оставија“, додаде Вучиќ.

„Газпромнефт“ неодамна потврди дека е потпишан прелиминарен договор со унгарската компанија МОЛ за продажба на 56,15 отсто од акциите во НИС. За финализирање на трансакцијата потребно е одобрение од американските власти, поради режимот на санкции кон руските компании.