Вучиќевиот одговор до „Гардијан“ заврши во рубриката „писма од читатели“

Претседателот на Србија, Александар Вучиќ, испрати реакција на уредничкиот став на британскиот „Гардијан“, но неговиот текст е објавен во рубриката „Letters to the editor“ – меѓу писмата на читатели во викенд-изданието и на сајтот на весникот, пренесе nova.rs. Според медиумот, тоа го потврдуваат и фотографии од печатеното издание.

За Н1, аналитичарот за меѓународни односи Мирко Даутовиќ изјави дека одговорот на Вучиќ е сместен во делот „писма на читатели“ на седмата страница од додатокот за викенд, „под фотографии од пазар“, нагласувајќи ја симболиката на уредничката одлука.

Во онлајн-верзијата на писмото со наслов „Serbia cannot accept violent street protests“, Вучиќ тврди дека во изминатите месеци имало десетици илјади ненajавени протести, дека дел од нив ескалирале со насилство и дека полициските реакции биле „воздржани“, додавајќи дека владата прифатила дел од барањата на студентите и дека ќе се спроведат избори и реформи.

Пoлeмиката следи по уредничкиот коментар на „Гардијан“ од 25 август, во кој редакцијата оцени дека демонстрантите во Србија „заслужуваат повеќе поддршка и солидарност од ЕУ“ и го опиша присуството на Вучиќ во политиката на Западен Балкан како „малигно“.

nova.rs потсетува дека ова е уште едно во серија писма што Вучиќ ги упатува до западни медиуми во обид да одговори на критиките; претходно реагираше и на уводник на „Фајненшл тајмс“.