Skip to content
Долго време 10.000 чекори дневно се сметаа за „златен стандард“ за здрав живот. Но, нова голема студија објавена во престижното списание Lancet Public Health покажува дека 7.000 чекори дневно можат да бидат доволни за подобрување на мозочните функции и заштита од сериозни заболувања.
Зошто 7.000 чекори?
Истражувањето, кое ги анализирало податоците на повеќе од 160.000 возрасни лица ширум светот, утврди дека во споредба со луѓето што прават само 2.000 чекори на ден, оние што одат 7.000 имаат значително помал ризик од:
- кардиоваскуларни болести – за 25%
- рак – за 6%
- деменција – за 38%
- депресија – за 22%
Дури и 4.000 чекори дневно се подобри за здравјето отколку минималната активност. Најголемата корист се стабилизира кај 7.000 чекори, иако за срцето дополнителни придобивки постојат и со поголем број чекори.
Од каде доаѓа бројката од 10.000 чекори?
Интересно е што таа воопшто не е резултат на медицински истражувања. Потекнува од маркетиншка кампања во Јапонија во 1960-тите, кога бил промовиран педометар со име manpo-kei („бројач на 10.000 чекори“). Со тек на време, бројката стана неформална препорака, а денес ја користат повеќето фитнес-апликации и уреди.
Пешачењето и менталното здравје
Експертите нагласуваат дека бројките се помалку важни од самата активност. Пешачењето, дури и во пократки интервали, носи видливи придобивки за менталното здравје, концентрацијата и расположението.
Што велат експертите?
- „10.000 чекори не се базираат на докази“, вели д-р Мелоди Динг, главната авторка на студијата.
- Д-р Даниел Бејли од Универзитетот Брунел во Лондон додава дека реална и остварлива цел за повеќето луѓе е 5.000–7.000 чекори дневно.
- Според д-р Ендрју Скот, „повеќе секогаш е подобро, но луѓето не треба да се грижат ако не секогаш ја достигнуваат целта“.
Заклучок: Не е важно бројот – важно е движењето
Светската здравствена организација и понатаму препорачува најмалку 150 минути умерена физичка активност неделно, но оваа студија покажува дека и едноставното броење чекори може да биде практичен начин за следење на напредокот.
Дури и домашните активности како усисување или градинарство можат да се бројат како физичка активност.
Следниот пат кога ќе размислувате дали да прошетате – запомнете: не мора да стигнете до 10.000 чекори. Доволно е да се движите редовно и со тоа значително го подобрувате вашето здравје.
