Загинаа 25 лица во пожар во ноќен клуб во Гоа, Индија

Во пожар што во саботата доцна навечер избувнал во ноќниот клуб „Бирч“ во местото Арпора, во индиската сојузна држава Гоа, загинале 25 лица, а шестмина се повредени, соопштија локалните власти.

Индиските власти наредија истрага за причината за пожарот и понудија отштета за жртвите, пренесе Ројтерс.

„Наредив судска истрага за целиот инцидент за да се утврдат причината и одговорноста,“ изјави главниот министер на Гоа, Прамод Савант, во објава на платформата X.

Тој додаде дека шесте повредени лица се во стабилна состојба и примаат медицинска нега.

Индискиот премиер Нарендра Моди објави на X дека неговата канцеларија ќе понуди отштета до 200.000 рупии (1.889 евра) за секое семејство на загинатите и 50.000 рупии за повредените.

Полицијата соопшти дека пријавата за пожарот во клубот „Бирч“ ја добила во 00:04 часот по локално време.

Пожарникарите работеле цела ноќ на гаснењето на огнот, а телата на сите загинати биле пронајдени. Најмалку четворица од загинатите биле туристи, а 14 биле вработени во клубот, соопшти локалната полиција.