Зеленски бара дополнителна помош од САД и го покани Трамп во Украина

 Украинскиот претседател Володимир Зеленски ги повика САД да обезбедат повеќе средства за неговите сили за да се спротивстават на Русија и го покани поранешниот американски претседател Доналд Трамп во Украина за да се увери во размерите на конфликтот.

Зеленски рече дека е можно американските трупи на крајот да бидат вовлечени во поширок конфликт со Русија во Европа, доколку Вашингтон не ја засили својата поддршка.

„Ако Русија не убие сите нас, ќе ги нападне земјите на НАТО, а вие ќе ги испратите вашите синови и ќерки (да се борат), рече Зеленски во денешното интервју за Ен-Би-Си.

Американскиот претседател Џо Бајден, кој е демократ, бара од Конгресот на земјата да усвои предлог-закон за дополнително финансирање во вредност од 106 милијарди долари, чиј главен дел е наменет за зајакнување на украинската одбрана, а остатокот ќе биде распределен меѓу Израел, Индо-пацифичкиот регион и граничната безбедност.

Претставничкиот дом на САД, во кој доминираат републиканците, наместо тоа, усвои сопствен план . Минатата недела усвои предлог-закон со кој се обезбедува помош од 14,3 милијарди долари за Израел, но тој не вклучува зголемување на помошта за Украина.