Украинскиот претседател Володимир Зеленски вчера им го одзеде државјанството на неколку поранешни влијателни проруски политичари, како најнов потег за „прочистување“ на земјата од проруски влијанија.
Денеска ги потпишав соодветните документи за да направам уште еден чекор во заштитата и чистењето на нашата земја од оние кои се на страната на агресорите“, рече Зеленски за време на ноќното видео обраќање.
Зеленски не сакаше да ги именува, но рече дека имаат двојно руско државјанство.
Според украинските медиуми, на списокот има неколку водечки политичари од кабинетот на Виктор Јанукович, кој беше проруски претседател на Украина од 2010 година до неговото отстранување од функцијата во 2014 година.
На списокот се најдоа и Дмитро Табачник, поранешен министер за образование и наука, Андреј Кјуев, поранешен вицепремиер и шеф на администрацијата на Виктор Јанукович, и Виталиј Захарченко, поранешен министер за внатрешни работи, објавија украинските медиуми.
Од почетокот на руската инвазија врз Украина, на 24 февруари минатата година, украинското раководство им го одзеде украинското државјанство на голем број лица и санкционираше стотици руски и белоруски поединци и компании.
