Зеленски од Париз му се обрати директно на Путин

„Средбата е неопходна. Не е прашање на желба, туку на неопходност. Ние поддржавме и трилатерален и билатерален состанок во кој било формат. Верувам дека Русија прави сè што може за да го одложи“, рече Зеленски на прес-конференција по самитот „Коалиција на волјата“ во Париз.

„Нашите американски партнери нè информираа дека Путин ме покани во Москва. Верувам дека ако сакате да го спречите одржувањето на состанокот, треба да ме поканите во Москва.“

Зеленски рече дека самиот факт што Путин почнал да зборува за таков состанок е позитивен знак, но засега нема индикации дека Русија сака да ја заврши војната.

„Возрасните треба да излезат од состанок на ова ниво со некаков резултат, по можност со крај на војната.“

Украинскиот министер за надворешни работи Андриј Сибиха претходно изјави дека предлогот на Путин да се сретне со Зеленски во Москва е „неприфатлив“.