Skip to content
Украинскиот претседател Володимир Зеленски ги дефинираше трите клучни точки што Киев ќе ги внесе на најавениот самит на Русија–САД, инициран од американскиот лидер Доналд Трамп. На прво место е „итен прекин на огнот и завршување на убиствата“, со нагласок дека токму Москва мора формално да се обврзе на примирје.
Вториот приоритет, објавен преку платформата X, е да се создаде договорна рамка што ќе доведе до „вистински долготраен мир“ – формула која треба да ги надмине досегашните преодни прекини на непријателства.
Третиот столб, според Зеленски, е долгорочната безбедност на Украина, која мора да биде изградена „заедно со Соединетите Држави и Европа“. Таа безбедносна архитектура, потенцира тој, треба да спречи идни кризи и да гарантира територијален интегритет.
Во пресрет на можниот самит со рускиот претседател Владимир Путин, Зеленски започна телефонска дипломатска офанзива. Веќе разговарал со германскиот канцелар Фридрих Мерц и францускиот претседател Емануел Макрон, а најави уште низа контакти со европските партнери за усогласување на заедничката позиција пред средбата.
Украина одамна укажува дека решението за војната ќе биде валидирано на највисоко државничко ниво. За Киeв, патот до трајно примирје води низ силен западен фронт и недвосмислена руска изјава дека оружјето молчи.
