Skip to content
Претседателот на Украина, Володимир Зеленски, денес изјави дека на состанокот на украинскиот Генералштаб, главна тема била зајакнувањето на способноста на Украина да извршува напади со долг дострел врз Русија и нагласи дека нафтената индустрија на земјата веќе ја плаќа цената на војната.
Зеленски изјави дека на состанокот присуствувале производители на оружје и сите одговорни за употребата на системи со долг дострел, како и дека била анализирана ефикасноста на украинските напади во претходниот период.
„Рафинериите за нафта во Русија веќе ја чувствуваат вистинската цена на војната и ќе платат уште повеќе. Си поставивме задача да ја прошириме употребата на нашите можности за долг дострел“, рече Зеленски во објава на социјалната мрежа X.
Украинскиот претседател истакна дека Киев тесно соработува со домашните производители на оружје по долгорочни договори.
Украина и ЕУ ќе подготват план за прекин на огнот во рок од 7-10 дена
Володимир Зеленски денес изјави дека во текот на следната недела или 10 дена, Украина, заедно со лидерите на европските земји, ќе подготви краток план за прекин на огнот.
„Планот треба да биде краток, без непотребни детали. Неколку кратки точки. На пример, планот за прекин на огнот. Одлучивме дека ќе работиме на него во текот на следната недела или 10 дена“, рече Зеленски во интервју за Аксиос, пренесува Укринформ.
Зеленски ја нарече својата средба со американскиот претседател Доналд Трамп во Белата куќа „конструктивна“, признавајќи дека не била лесна.
„Моите разговори со претседателот Трамп беа за вршење притисок врз Русија. Мислам дека тој сакаше да изврши притисок врз нив, но не сакаше да го ескалира конфликтот или да го затвори прозорецот… за дипломатија“, рече тој.
