Skip to content
Украинскиот претседател Володимир Зеленски изјави дека Соединетите Американски Држави подготвуваат пакет воена помош за Украина во вредност од 725 милиони долари и посочи дека тоа ќе биде значајна поддршка за војниците на фронтот.
Тој во телевизиско обраќање изјави дека оваа недела од Литванија пристигнала нова помош, која вклучува муниција и резервни делови за оклопни возила, а се заблагодари и на Холандија за фрлачите „Патриот“.
„Ја гледаме и подготвеноста на нордиските и балтичките земји да ги зголемат инвестициите во нашата одбранбена индустрија, особено во производството на домашни дронови, за што сум благодарен“, рече тој.
Тој додаде дека Норвешка одлучила да обезбеди поголема финансиска поддршка за Украина во наредната година и дека постои одлука на Луксембург да обезбеди средства за набавка на оружје за украинските сили.
„Дополнително, ја цениме одлуката на Обединетото Кралство да воведе санкции за руската флота на танкери во сенка, бидејќи тоа е она што го држи целиот свет на вистинскиот пат кон правдата, кон тоа да ја гледа Русија како одговорна за оваа војна и нејзините последици и да ја принуди на мир. Светот има моќ да го оствари тоа“, рече Зеленски.
