Зеленски во Новата 2025 година најави крај на војната со Русија

Украинскиот претседател Володимир Зеленски во своето новогодишно обраќање до нацијата во рече дека неговата земја „ќе стори се“ за да ја заврши војната со Русија во 2025 година.

„Нека 2025 биде наша година. Годината на Украина. Знаеме дека мирот нема да ни биде подарок, но ќе направиме се за да ја запреме Русија и да ставиме крај на војната“, рече тој во својот говор објавен на социјалните мрежи.

Зеленски додаде дека Украина треба да се бори во 2025 година на „бојното поле“, но и на „преговарачка маса“ за да се стави крај на речиси тригодишната руска инвазија.

„Во година пред нас ќе треба да се бориме секој ден за Украина, која е доволно силна, бидејќи само таква Украина ќе се почитува“, рече Зеленски.

Новата 2025 година носи неизвесност во Украина и стравувања дека американската воена и политичка поддршка, ќе се намали со преземањето на властал во САД од Доналд Трамп.

Администрацијата на американскиот претседател во заминување Џо Бајден и додели на Украина воена и буџетска помош од речиси шест милијарди долари.

Трамп рече дека ќе го прекине конфликтот за „24 часа“ кога ќе ја преземе функцијата, предизвикувајќи стравувања дека Украина ќе биде принудена да ги напушти териториите под контрола на Русија во замена за мир.

„Не се сомневам дека новиот американски претседател е подготвен и способен да постигне мир и да стави крај на агресијата на Путин“, рече Зеленски во својот говор.

Рускиот претседател Владимир Путин не ја спомена конкретно војната во Украина во својот новогодишен говор, но ги пофали руските војници за нивната „храброст“.