Skip to content
Жан-Паскал Хом (28) од Бранденбург денеска со 633 од 725 присутни членови на основачкото собрание е избран за лидер на новата младинска организација на Алтернатива за Германија АфД (AfD) наречена „Генерација Германија“.
На основачкото собрание немаше други кандидати, а Јан Рихард Бер беше избран за негов заменик, објави „Велт ам Зонтаг“.
Хом е член на АфД од 2014 година, а во својот говор за време на кампањата изјави дека сака да соработува со сите фракции во партијата и да не дозволи да биде инструментализиран во борбите за власт.
Тој додаде дека има намера решително да се спротивстави на сите тенденции на раздор „без разлика дали доаѓаат одвнатре или однадвор“.
Името на Хом, член на десничарската АфД, се појавува десетици пати во извештајот за класификацијата на покраинската гранка на партијата што го изработи канцеларијата на Бранденбург за заштита на уставот, во кој се наведува дека има антиимигрантски и националистички ставови.
„Решително ќе се бориме за вистинска промена во миграциската политика што ќе обезбеди Германија да остане татковина на Германците“, рече Хом на основачкиот состанок на Генерацијата Германија.
На состанокот беше усвоен и младинскиот статут, кој ги дефинира правилата за улогата и работата на новата организација, која, за разлика од претходникот, Младата алтернатива, е наменета за близок однос со АфД.
Колидерката на АфД, Алис Вајдел, рече дека младинската организација е како полигон за обука на идните лидери.
Поради денешниот состанок, од утринава во Гисен, на неколку места се организираа собири против оваа партија и се блокираа пристапните патишта до градот, а во еден момент имаше конфликт меѓу полицијата и демонстрантите кои фрлаа камења и шишиња кон полицијата, која одговори со водни топови и употреба на бибер спреј.
АфД заврши втора на националните избори во февруари со повеќе од 20 проценти од гласовите и моментално е најголемата опозициска партија во земјата, а поддршката расте поради незадоволството од работата на коалициската влада на канцеларот Фридрих Мерц.
Германската разузнавачка служба претходно ја означи Младата алтернатива како докажана десничарска екстремистичка група, а потоа и самата АфД, но таа ознака беше суспендирана откако партијата покрена судска постапка.
