Skip to content
Ако судиме по денешната прес-конференција, во владината коалиција очигледно има два временски појаса: утрински – за насмевки, заеднички фотографии и европска реторика, и попладневен – за внатрешни престрелки, лажни дистанци и глумење опозиција од комотните фотелји на власта. Движењето ЗНАМ одлучи јавно да го „потсети“ Антонио Милошоски дека политичките фантазии за премиерска реконструкција немаат многу врска со реалноста.
На прес-конференција на Движење ЗНАМ – За Наша Македонија, потпретседателот Павле Арсоски изјави дека „среќа за сите“ е тоа што Антонио Милошоски, потпретседател на Собранието и член на Извршниот комитет на ВМРО-ДПМНЕ, не е премиер на државата. Поводот беше неговиот настап во кој тој отворено го доведе во прашање квалитетот на работата на министерот за правда Игор Филков – претседател на Централниот одбор на ЗНАМ и, како што нагласи Арсоски, еден од „најуспешните министри во Владата на Мицкоски“.
„Антонио Милошоски е последниот кој има кредибилитет да држи лекции за правосудни стандарди. Го слушнавме како објаснува што би направил и што би реконструирал кога би бил премиер. Добро е да потсетиме, за среќа на сите: тој не е премиер, ниту бил, ниту ќе биде“, изјави Арсоски, со јасна политичка стрела кон коалицискиот партнер.
Во продолжение, потпретседателот на ЗНАМ се обиде да ја приземји расправата во бројки и документи, наместо во лични желби и сценарија. Според него, Министерството за правда и министерот Филков во изминатите 18 месеци подготвиле 28 закони, кои се во различна фаза на носење, при што посебен акцент е ставен на законите поврзани со реформската агенда и владеењето на правото. „Повеќето закони се веќе доставени до Владата и се во владина процедура“, нагласи Арсоски, додавајќи дека тоа е резултат кој не е забележан во поновата историја на Македонија.
Арсоски порача дека во интерес на државата и на граѓаните е да се продолжи со посветената работа на реформските процеси, кои, според него, се единствениот реален пат кон европска иднина. Притоа, тој побара од ВМРО-ДПМНЕ „во најкраток можен рок“ јавно да се огради од ставовите на Милошоски, испраќајќи сигнал дека ЗНАМ очекува политичко порамнување во рамките на владејачката структура.
Новинарите го отворија и прашањето за ставот на ЗНАМ околу измените на Кривичниот законик, особено контроверзниот член 353 – злоупотреба на службена положба. Арсоски потсети дека движењето уште пред минатогодишните парламентарни избори било „кристално јасно“: проблематичните измени треба во најитна постапка да се вратат на претходното ниво и санкциите да бидат во иста тежина, па дури и да се зголемат. „И ние опстојуваме на тоа и работиме на тоа“, додаде тој, сугерирајќи дека прашањето за одговорност во јавните функции не смее да се релативизира.
Следеше и незгодно прашање за Владата: ако, како што рече Арсоски, речиси 90 проценти од подготвените закони се уште се во владина процедура, дали тоа значи дека премиерот и владиниот тим се однесуваат неажурно кон предлозите на Министерството за правда и дали процесот треба да се забрза. „Законите се подготвени. Некои се измени и дополнувања, некои се комплетно нови. Но прашањето треба да го упатите кон Владата и премиерот Мицкоски, не кон Движење ЗНАМ, затоа што министерот со неговиот тим ја сработи работата и оваа цела плејада на закони се во одредена фаза на постапка“, одговори Арсоски, суптилно префрлајќи ја одговорноста кон коалицискиот партнер.
Со денешната прес-конференција, Движење ЗНАМ практично отвори фронт во рамките на владејачката архитектура: од една страна бранат министер за правда кој го сметаат за столб на реформите, од друга бараат дисциплинирање на висок функционер на ВМРО-ДПМНЕ кој јавно го оспори истиот министер. Утринска коалиција, попладневна опозиција – но за граѓаните останува отворено прашањето дали правдата и реформите ќе бидат жртва на оваа внатрешна партиска геометрија.