Skip to content
Додека седам пред компјутерот и пиејќи чај ги прелистувам најновите вести, една тема ми го привлекува вниманието – овој месец е посветен на подигнување на свеста за инфекцијата со ХПВ. Важна тема, која ме натера да се запрашам: Зошто толку многу жени ги избегнуваат гинеколошките прегледи? Одговорот не секогаш лежи во стравот или негрижата, понекогаш, сè се сведува на економија.
Соња ТАНЕСКА
Ајде да бидеме реални! Комплетен гинеколошки преглед – тест за ХПВ, ПАП тест ( цената е 1300 денари бидејќи веќе не е бесплатен еднаш годишно) микробиолошки анализи – чини околу 3000 денари, за некои, тоа може да биде само викенд потрошен на кафе и салата, но за многу жени, тоа претставува сериозен финансиски товар. А ако прегледот покаже проблем и е потребна терапија, како вагиналети или друг лек, што мислите? Ништо од тоа не е покриено со здравственото осигурување. Сè е на ваша, наша сметка.
Не можам да не се запрашам – колку жени молчешкум ја игнорираат својата здравствена состојба само затоа што превенцијата се чини како луксуз што не можат да си го дозволат?
Вистината е дека не е само до парите тука е и пораката што ја испраќаме. Кога превентивната грижа – нешто што спасува животи – е недостапна или скапа, им порачуваме на жените дека нивното здравје е приоритет. Проповедаме за важноста на самогрижата и раното откривање, но создаваме бариери толку високи што дури и најодговорната жена би се двоумела да ги премине.
И тука е стигмата. За многу жени, одењето на гинеколог повеќе личи на исповед отколку на лекарска посета. Додадете ја оваа непријатност на високите трошоци, и не е изненадување што многу од нас одлучуваат да ја избегнат оваа посета.
Додека го одбележуваме овој месец за подигнување на свеста за ХПВ, можеби е време да го прошириме разговорот. Да, едукацијата за ХПВ и за ракот на грлото на матката е критична. Да, треба да ги поттикнуваме жените сериозно да се грижат за своето здравје. Но, да не ги заборавиме системските проблеми. Достапната здравствена заштита не треба да биде замислена именка – таа е потреба.
Сè додека ова не се промени, ќе продолжиме да гледаме жени кои ги балансираат своите приоритети, размислувајќи дали да ја платат киријата или да одат на преглед, надевајќи се дека игнорирањето на проблемот нема да го направи поголем.
Дами, ајде да зборуваме отворено, а вие, носители на одлуки, ако слушате, да им го олесниме изборот на жените – и финансиски и емотивно – за да можат да го преземат управувањето со своето здравје. Затоа што превенцијата не треба да има цена што само некои можат да ја платат.
