Кинески ласер нишанел германски авион во Црвеното Море

Берлин го повика кинескиот амбасадор на вонреден разговор, откако германското Министерство за одбрана соопшти дека кинески воен брод насочил ласерски зрак кон германски авион кој учествува во европската поморска операција „Аспидес“ во Црвеното Море. Според министерството, инцидентот се случил на почетокот на јули за време на рутински лет за извидување, при што е прекината мисијата од претпазливост, а леталото безбедно слетало во базата во Џибути.

Германското МНР изјави дека со овој чин е „загрозена безбедноста на персоналот и нарушена операцијата“, оценувајќи го потегот како „целосно неприфатлив“. Портпаролот на одбраната додаде дека кинескиот брод не упатил никаква претходна комуникација, иако воени единици на двете земји се сретнувале повеќепати во реонот.

Операцијата „Аспидес“, именувана по старогрчкиот збор за „штитови“, започна во февруари 2024 година како одговор на зголемените напади врз трговски бродови во Црвеното Море. Германската армија придонесува со до 700 воени лица и авиони-платформи за повеќесензорско извидување, што практично служат како „летачко око“ за безбедност на пловните коридори.

Нападите се случуваат во услови на поширока регионална нестабилност. Од октомври 2023 година, бунтовничкото движење Хути од Јемен, поддржано од Иран, истрелува ракети кон Израел и го таргетира цивилниот сообраќај, тврдејќи дека постапува во „солидарност со Палестинците“. Европските власти предупредуваат и на растечкото кинеско влијание врз критичната инфраструктура и клучните бродски рути, потенцирајќи ја потребата од координиран одговор.

Пекинг досега повеќепати ги негираше обвинувањата за опасна употреба на ласери против странски летала. Сепак, случаи во кои е директно вклучена земја-членка на НАТО, како Германија, се ретки и дополнително ги заоструваат односите меѓу Европската унија и Кина.