Skip to content
Советот на Народната банка на седницата одржана на 15 јули 2025 година изгласа целосно нов модел за тарифирање на услугите што банките ги плаќаат за извршување и порамнување плаќања во Македонскиот интербанкарски платен систем (МИПС). Новиот систем, усогласен со практиките на Евросистемот, поставува фиксни и однапред предвидливи надоместоци според обемот на трансакциите, што им овозможува на банките да ги поедностават и намалат трошоците што им ги префрлуваат на клиентите за електронски плаќања.
Истовремено, Советот воведе и единствена tarifa за државните органи при плаќања во евра кон земјите од СЕПА: 3 евра по трансакција за електронски налози и 5 евра за хартиени. Според Народната банка, овие ниски и фиксни такси, за разлика од досегашните варијабилни надоместоци што произлегуваа од кореспондентските аранжмани со странски банки, ќе донесат значителна буџетска заштеда.
Оваа одлука е дел од подготовките за приклучување на Северна Македонија кон СЕПА и претставува чекор кон поевтини прекугранични плаќања во евра, како за државата, така и за граѓаните и компаниите. Централната банка најавува дека и натаму ќе работи на намалување на трошоците и подобрување на квалитетот на платните услуги.
На истата седница Советот го усвои и кварталниот Извештај за ризиците во банкарскиот сектор. Во услови на стабилен економски раст и благо забрзана инфлација, банкарскиот систем останува солвентен и ликвиден, а кредитната и депозитната активност бележат солиден раст. Добивката, сепак, расте побавно поради пониски каматни приходи, што ја наведува Народната банка да задржи претпазлива политика во очекување на глобалните ризици.
Советот ја одобри и имплементацијата на новиот информациски систем ИСИДОРА, кој со фазна примена ќе го замени постојниот начин на собирање податоци од банките и штедилниците. Системот ќе испорачува пообемни и поквалитетни податоци за монетарната статистика и финансиската стабилност, во целосна усогласеност со европските стандарди.