Skip to content
Папата Лав XIV денеска во Либан упати силен повик за меѓурелигиски дијалог, нагласувајќи дека токму оваа земја, со својата долга традиција на верски плурализам, претставува пример за мирен соживот. На собирот на Плоштадот на мачениците во Бејрут, пред верници од различни заедници, тој истакна дека Либан покажува како христијани, муслимани, Друзи и други групи можат да градат заедничка иднина заснована на почитување и дијалог.
„Во време кога соживотот понекогаш изгледа недостижен, Либан останува силен потсетник дека стравот и предрасудите не се последниот збор. Единството, помирувањето и мирот се можни“, порача понтифексот. Тој ги повика Либанците да останат пример за мир и толеранција и да продолжат да ги отфрлаат насилството и исклучувањето.
Настанот се одржа во присуство на претставници на различни верски заедници, во непосредна близина на градската џамија Мохамед ал-Амин и катедралата Свети Ѓорѓи, два симбола на мултирелигиозниот идентитет на Бејрут. Верниците го пречекаа папата под силни безбедносни мерки, во период кога земјата се соочува со сериозна економска криза и нестабилна безбедносна состојба по последниот конфликт меѓу Израел и Хезболах.
„Јас сум муслиман, но папата е за сите луѓе. Во оваа земја ни треба единство и молитва“, изјави еден од присутните верници, Сами Кабани. Пред обраќањето, Лав XIV присуствуваше на муслиманска молитва, а претходно го посети манастирот северно од Бејрут, каде се помоли на гробот на свети Шарбел.